حيرني أمر نادي الزمالك أو كما كان يطلق عليها القلعة البيضاء ما ان يخرج من جحر حتي يقع في جحجيرة!..
ومشكلتي انني متزملك منذ ان كنت صغيرا أيام حسن حلمي زامورا واللاعبين حمادة إمام وحسن شحاتة وفاروق جعفر ما أيام كانت القلعة البيضاء تقدم فنون الهندسة في كرة القدم.
وأصابتني جميع الامراض وبالطبع أنا وكثير من المشجعين نتيجة ما يحدث في القلعة البيضاء ماذا اصابها.. لقد تم فعل كل شيء مجالس ادارة وغيروها لا منتخب نافع ولا معين نافع ولا خليط نافع.. وغيروا الاجهزة الفنية برضه مافيش فايدة جابوا محلي برضه مش نافع.. جابوا خواجات برضه مش نافع!
احترت واحتار دليلي في نادي الزمالك حتي اللعيبة غيروا منها وبدلوا وجابوا جديد ومشوا قديم.. طب ناقص ايه.. الواد عبده العفش قال لي طب ما تغيروا المشجعين كده!
خلاص بقي النادي ملطشة لأي حد يتريق عليه!
قلت أكيد الزمالك معمول له عمل كبير.. ومافيش غير اني اذهب الي الشيخ شمهورش وده شيخ كبير وسره باتع.. وان شاء الله حيعرف يفك العمل ده!
رحت للشيخ شمهورش وجبت أطر له من مجلس الادارة ومن الجهاز الفني ومن اللاعبين ومن الاعضاء ومن المشجعين ودفعت المعلوم.. وبمجرد ان ذهبت أمام الشيخ.. لقيت عينه احمرت وصرخ فيا وقال مش ممكن.. وفيه عفريت في كل حتة في النادي ده.. والشياطين الحمر معششين فيه! قلت جري ايه يا شيخ هو أنت منهم.. أكيد أنت أهلاوي! تركته وذهبت الي الشيخة تفيدة ولعة!
وقلت لها انتي مبروكة وعايز تشوفي لي مين اللي عمل عمل في القلعة البيضاء وعايزاك تفكيه!
صرخت الشيخ تفيدة ولعة وقالت دا اللي معمول من النادي عمل كبير قوي محدش يقدر يفكه.. دا عايز 500 شيخة.. يا ابني الشياطين الحمر معششة فيه!!
حتي انتي يا تفيدة حرام عليكم.. أنا احترت عايز نفك العمل ده!
ذهبت الي الشيخ عبده الجن وخذ مبلغ كبير قوي وقال احنا ممكن نفك العمل ده بس تنفذ اللي حقولك عليه بالحرف.
قلت تحت أمرك يا شيخ.. أولا لازم نبحث عن ناس بتحب القلعة البيضا.. ناس تحبه باخلاص.. مش ناس داخلة عن مصلحة شخصية أو شهرة أو دعاية.. ولازم يكونوا يعرفوا في الكورة!
قلت طب دول نجبهم منين..
قال موجودين بس يا ابني الشياطين بعدوهم عن القلعة.. دول لازم يرجعوا أو تجيبوا ناس من القلعة الحمرا.
لا يا شيخ بلاش دي.. ولازم الناس تتحد لمصلحة النادي.. ويضعوا لوائح صح.. وتمشي علي الكبير قبل الصغير.. واللي مش عاجبه يرحل!
وكمان لازم تجيبوا حوالي ألف ديك شرشيري بيض بعرف أحمر.. ما بلاش اللون ده يا شيخ.. ده لون بيجيب لي الضغط.. ليه يا ابني هو أنت لسه مجلكش ضغط من الفريق!
وندبح في كل شبر من القلعة البيضا ديك ونرش بدمه أرض الملعب واللعيبة! وبعدين تسرحوا اللعيبة والجهاز الفني والاعضاء.
واستدعي الشيخ عبده الجن احد العفاريت وقال له عايزك تروح القلعة البيضا عايز نفك الاعمال اللي هناك.. فوجئت بالعفريت بيعيط ويلطم ويقول لعبده الجن أنا اروح أي حتة الا المكان ده!.. ولبس العفريت الطاسة في دماغه.. وقال حرام عليك يا شيخ أنا مش قد الشياطين الحمر اللي هناك!!
18
