ما أحلي اتحاد الجبلاية عندنا انه حريص كل الحرص علي سلامة لاعبيه وبمجرد ان عرف عيد الأضحي علي الابواب حتي عقد لجنة المسابقات اجتماعا عاجلا وطالبت بتأجيل الدوري بعد العيد حتي يتسني للاعبين هضم لحمة الاضاحي وقلت لمراتي شوفتي الاتحاد حريص اد ايه علي صحة اللعيبة.
قالت المدام لايافالح ما اجلوش الدوري عشان العيد ده اجلوه علشان المنتخب يستعد لغانا.. دي الحجة الظاهرة. ياعبيطة.. نعم يادلعدي..
معلهش سميتها انا اللي عبيط.. ايوه كده رجالة ماتجيش الابالشخط.
طب يامدام طول عمر المنتخب بيشارك في مباريات وبطولات ماكنوش بيوقفوا الدوري الا لمدة اسبوع او عشرة ايام بالكثير اشمعني المرة دي حيوقفوا لمدة شهر!
ياعني حيقفوا الدوري عشان العين.. ايوه كده يامدام عشان كل لاعب حيضحي.. اكيد حيضحي بالنادي تباعه وطاحن اننا مقبلون علي موسم بيع اللعيبة في يناير..!
طب ليه مايكونش النادي هي اللي حيضحي باللعيبة في العيد ويذبحهم يعني يخرجهم من القائمة بتاعتهم!
اللاعب يضحي بناديه بقت عادية من ساعة مادخلوا الاحتراف او الانحراف ده.. والنادي بقي يضحي باللاعب عشان يشوف لاعب اثقل منه!
بص بقي يامدام اللاعب حيدبح عجل او خروف.. وحيقعد ياكل فيه شهر كامل لحد مايخلص وطبعا وزنه حيزيد ومش حيتمرن وعشان كده اتحاد الجبلاية اللي هو اتحاد الكرة كان رحيم بيهم واداهم اجازة اسبوع يأكل وينبسطوا ويبرطعوا في اللحم الضاني.. والبتلو والكندوز.. والاندية برضه حتضحي بعدد كبير من اللعيبة.
طب دول لحمتهم تبقي ضاني والا كندوز..لادي لحمة 'منحسة'! اخدت علي النوم او الكسل في المباريات..
واللعيبة دي لازم يضحوا بيها عشان كبروا في السن ولحمتهم حتبقي جامدة.. وماتستويش بسهولة في حلة الدوري العام .. عشان كده بيضحوا بيها ويبشتروا لعيبة صغيرة في السن تكون لحمته سهلة الهضم عند الجماهير والجهاز الفني وتستوي بسرعة علي نار الدوري..
بس دي تمنها حرام حرام غالي ماتفرقش حاجة مع الاندية دي البركة في رجال الاعمال اللي بتقرب من الجماهير والمسئولين في البنوك بدفع ثمن الاضاحي الجديدة اللي هيه اللعيبة! والبركة في قروض البنوك.
طب يافالح ماقمتش تجيب لنا ضحية العيد ليه ولحد دلوقتي.. عايزني اضحي بلعيبه علي آخر الزمن.. دي لحمتهم حتبقي زفة..!!
لعيبة ايه وهباب ايه.. انا عايزاك تجيب لنا بجمل..
انت عايزة عجل غيري.. ماهو ياريتك تنفع عجل ماكنش دا بقي حالنا!!
احنا عايزين عجل ندبحه ونأكله ونضحي بيه!
اكتر من كده تضحية يامدام.. ما أنت مضحية بيا من أول يوم جواز..!
عايز ا ضحي بعجل يتاكل يابني آدم.. في العيد انا مش زي اي واحدة من جيرانا كلهم مضحيين بعجول.. يانهار اسود كل جيرانك متجوزين 'عجول'!!.. يظهر انا اللي حاضحي بيك.. ورفعت السكينة علي رقبتي فقلت يادام انا جوزك مش لاعب كبر في السن!!
18
